CAGAYAN DE ORO CITY – Nakasakmit ang lower units sa Police Regional Office 10 sa balor 4.9 milyones pesos nga shabu ug marijuana sa magkalahing anti-illegal operations sa Northern Mindanao.
Pagsaysay sa tigpamaba sa PRO – 10 nga si Police Major Joann Navarro nga sa gilusad nga 50 ka anti-illegal drug operations, 64 ang nadakpan nga nagkupot sa sobra 732 gramos sa gitoohang shabu.
Naaresto usab sa kapolisan ang 88 ka personalidad tungod sa nagkadaiyang kasupakan sa balaod.
Kini naglakip sa 12 nga nadakpan sa kalambigitan sa ilegal nga pasugal ug 69 ka wanted personalidad nga nag-atubang sa nagkadaiyang kasong kriminal.
Nakasuhan na usab ang pito ka tawo nga naghupot sa ilegal nga mga armas resulta sa 298 ka magkalahing operasyon sa Kontra Boga ug Bilang Boga palibot sa rehiyon sa miaging semana.
