CAGAYAN DE ORO CITY – Midamyos sa 4 milyones pesos ang dakong sunog nga mikaon sa halos 80 ka balay sa Brgy 24 ning syudad kaganihang buntag.
Gibutyag ni Fire Inspector Kyle Lauzon,chief sa operations sa Bureau of Fire Protection- Cagayan de Oro District nga kabahin sa giatubang nila nga hagit ang kagagmay sa dalan ug kusog nga huyop sa hangin hinungdang gisaka sa ika-upat nga alarma.
Siya miingon nga mitala usab sa duha ka residente ang samaron nga gilangkuban sa samad sa kilay ug pagkasunog sa pamanit.
Dugang ni Lauzon nga natumbok na ang tinubdan sa pag-ulbo sa kalayo apan nagmaigmat sila pagtug-an kay aron kalikayan ang sayop nga impormasyon.
Hisayrang adunay report usab nga may pipila ka BFP firefighters nga naangol tungod sa kadako sa kalayo diin anaa sa 23 ka fire trucks ang nag-responde.
