CAGAYAN DE ORO CITY – Nabawian sa ilegal nga sigarilyo ang tulo ka tawo nga tuyo magpalusot niini sa magkalahing higayon sa Brgy Pamotolon,Kalilangan,Bukidnon.
Miila si Police Regional Office 10 Director Brig Gen Jaysen De Guzman sa mga dinakpan nga sila alyas Datu nga taga-Cotabato City ingon man si Maki ug Indong nga pulos naggikan sa Marawi City,Lanao del Sur.
Unang nasita sila Indong ug Maki nga nagsakay sa pribadong sakyanan nga naharang sa mga sakop sa mga pulis pag-abot sa Kalilangan gikan sa Marawi City.
Nabawian sila sa balor 80-mil ka pesos nga insimagol nga sigarilyo.
Samtang si Datu nga nakuhaan usab sa mga sigarilyo nga gisakay sa pribadong sakyanan nga nagbalor sa 368-mil pesos.
Ang maong mga kontrabando ang anaa na sa Bureau of Customs alang sa dugang pag-imbentaryo ug pagduso’g mga kaso batok sa mga dinakpan.
