CAGAYAN DE ORO CITY – Nakompiskar ang Police Regional Office 10 sa balor 46.6 milyon nga shabu gikan sa nagakadaiyang suspected drug personalities nga naglihok dinhi sa Northern Mindanao.
Kini nunot sa gipalig-on pa nga kampanya sa anti-illegal drugs campaign sa Police Regional Office 10 gamit ang regular police stations ug special units batok sa pagsumpo sa mga sindikato nga utok niini.
Gibutyag ni PRO 10 spoksperson Lt Col Michelle Olaivar nga ang pagkabawi sa sobra 6-mil gramos sa gitoohang shabu gikan sa mil-621 ka mga suspek ang natigayon sugod Enero hangtod sa ikaduhang semana sa Agosto ning tuiga.
Gitumbok ni Olaivar nga kabahin sa maong kalampusan kadtong mga minilyon nga kantidad sa shabu nga nakompiskar sa ilang special units dinhi sa syudad ug Bukidnon.
Dugtong niini,naka-pokus na lamang ang PRO sa pagpugong sa mga ilegal nga droga nga ipasulod dinhi sa Northern Mindanao gikan sa Lanao del Sur.
Kini human angkona ni PRO 10 Director Brig Gen Rolando Anduyan nga naselyuhan na nila ang entrance areas sa rehiyon nga kanhi agian sa mga kontrabando gikan sa NCR,Visayas ug pipila ka bahin sa Mindanao nga ipasulod dinhi sa Cagayan de Oro.
Miingon si Anduyan nga nahimo kining posible tungod usab sa epektibo nga kampanya sa PNP kauban ang ubang puwersa aron ubsan ang presensiya sa ilegal nga droga dinhi sa rehiyon.
