CAGAYAN DE ORO CITY – Gi-konsiderar sa PNP nga kabahin sa posibleng rason gipusil si Customs deputy collector for assessment Arthur Sevilla ang pagka-kompiskar sa balor 50 milyon pesos nga mga sigarilyo gikan sa China nga midunggo sa Mindanao Container Terminal o MCT sa Tagoloan,Misamis Oriental ning bulana lamang.
Gibutyag ni Police Regional Office -10 spokesperson Capt Francisco Sabud nga tanang anggulo ang gipatutukan nila sa mga imbestigador aron matumbok ang rason kon nganong laraw ipapatay si Sevilla.
Si Sevilla kinsa napaubos na sa operasyon ang nakaangkon sa mga igo sa tiyan ug paa dihang gisudlan sa iyang balay sa motorcycle in tandem suspects sa Brgy Bugo ning syudad sa miaging gabii.
Samtang gikompirmar sa PNP nga may nadawat nang death threats si Sevilla samtang naka-destino sa ilang buhatan sulod sa MCT sa Tagoloan,Misamis Oriental sa miaging Disyembre 2020.
Gibutyag ni Puerto Police Station commander Capt John Riel de la Cerna nga nakatutok ang ilang imbestigasyon sa trabaho ug personal nga kinabuhi ni Sevilla.
Siya miingon nga anaa pa sila sa pagtigom sa mga makolektang ebedensiya aron matumbok kon unsa ang motibo ug kinsa ang utok nga nagtinguha pagpapatay sa maong opisyal.
Una nang gibutyag ni De la Cerna nga nagbaton na usab sila sa person of interest nga hayan makatabang pagsulbad sa pagpusil sa biktima.
