CAGAYAN DE ORO CITY- Ipatawag sa Bureau of Fire Protection o BFP City District ang pamilyang Buntog alayon sa pag-ulbo sa sunog sa unom ka pinuy-anan sa Zone 4,Abellanosa-Burgos Streets,Brgy 17 ning syudad kagahapon sa kadlawon.
Kini human unang gitumbok nga nagsumikad ang pag-ulbo sa kalayo sa pinuy-anan ni Sylvia Buntog ug gilayong mikuyanap sa mga silingan niini.
Miingon si BFP City District Fire Marshall Supt Richard Arbutante nga kabahin kini sa ilang pag-imbestigar kon unsa’y hinungdan sa maong sunog.
Hinoon,wala’y natala nga tawo nga samaron sa maong sunog diin mitala’g tunga sa milyon ka pesos ang damyos.
Samtang gihagit karon ni City Administrator Teddy Sabugaa ang mga brgy kapitan nga ilhon ang mga residente nga nanimuyo sa kaugalingon nila nga lugar ning syudad.
Gihimo ni Sabugaa ang hagit nunot sa laing pag-ulbo sa sunog diin unom ka balay ang naugdaw sa Brgy 17 sa dakbayan kagahapon sa kadlawon.
Miingon si Sabugaa nga dili na gusto sa syudad nga mahitabo pa ang mga sunog nga ang hinungdan gumikan sa flying connection sa mga koryente sama sa nahitabo sa Brgy Macabalan sa miaging Disyembre 2017.
Hinoon,gipasalig ni Sabugaa nga tunulan sa tabang-pinansyal ang mga nasunugan sa Brgy 17 ug ipaubos usab sa scholarships ang mga tinun-an nga apektado sa trahedya.
