CAGAYAN DE ORO CITY-Kontrolado na karon sa militar ang duha ka kanhi stronghold sa Maute terror group sa sentrong bahin sa Marawi City.
Matud ni Joint Task Force Marawi spokesman Lt. Col. Jo-ar Herrera nga tima-ilhan lamang kini misamot na kahuyang ang pwersa sa Maute group nga anaa karon sa upat ka barangay sa maong syudad.
Miingon si Herrera nga moabot na usab sa 410 ka tag-as nga kalibre sa mga armas ang na-recover sa militar samtang nagpadayon ang clearing ug combat operations batok sa mga terorista.
Lakip sa na-ilog sa mga sundalo gikan sa ilang napatay’ng mga sakop sa Maute ang usa ka caliber 50 machinegun ug sniper riffles.
Samtang gikompirmar ni Herrera nga moabot sa 500-milyones ka pesos nga balor sa salaping cash ug mga alahas ang gikawat sa Maute group gikan sa mga residente sa Marawi City.
Miingon si Herrera nga mismo ang mga sibilyan nga naka-eskapo gikan sa Maute group ang mitug-an kanila sa gihimong ‘looting’ sa mga terorista.
Si Herrera namahayag nga ang pahayag sa mga naka-eskapong sibilyan, nagpamatuod nga mga terorista ang ga-ransak sa mga panimalay ug gambalay sa Marawi City ug gakuha sa kwarta ug alahas sa mga residente ug dili ang mga sundalo.
