Gitin-aw sa DSWD Region 10 pinaagi ni information officer Roshiel Galla ang posibleng kantidad sa ayuda nga madawat sa mga driver nga naapektuhan sa krisis sa petrolyo.
Sumala niya, sa National Capital Region gisugdan ang paghatag og lima ka libo pesos nga cash relief assistance ug giuna ang mga rehistradong tricycle drivers nga naa sa listahan sa lokal nga pangagamhanan.
Dugang pa, gisulti niya nga usa kini sa ilang ginatan-aw sa rehiyon kon kinsa ang unahon nga benepisyaryo lakip ang mga drayber sa PUJ, tricycle ug taxi aron masiguro ang hustong pag-apod-apod sa ayuda.
Busa, giingon niya nga ila pang klarohon kon pareho ba ang kantidad nga ihatag sa Region 10 ug kon asa magikan ang opisyal nga listahan sa mga kwalipikado nga benepisyaryo.
Gidugang niya nga posibleng magkuha og listahan gikan sa LTFRB ug sa mga lokal nga pangagamhanan aron masiguro ang sakto nga datos. Sa katapusan, gipasabot niya nga nagpadayon pa ang koordinasyon sa DSWD ug sa ubang ahensya aron matino ang pamaagi sa implementasyon sa programa sa rehiyon. (by James Oliver)
