CAGAYAN DE ORO CITY – Isumiter sa administrasyon ni Presidente Ferdinand Marcos Jr., ang gisugyot nga 2025 National Budget nga mubalor sa P6.352 trilyon sa House of Representatives, karong Lunes, Hulyo 29.
Ang 2025 National Expenditure Program pormal nga isumiter ni Budget Secretary Amenah Pangandaman kang Speaker Ferdinand Martin Romualdez ug ubang opisyal sa House of Representatives.
Ang simpli nga ‘turnover ceremony’ gitakda sa alas-10 sa buntag sa Romualdez Hall of the Chamber sa Batasang Pambansa complex sa Quezon City.
Sa bisperas sa pagsumiter sa NEP, namahayag si Speaker Romualdez nga andam na ang balay-balauranan sa pagdawat sa sugyot aron sugdan sa komite ang deliberasyon.
Gibutyag ni Romualdez nga gamiton ang iyang ‘oversight function’ aron maseguro nga husto ang himoong paggasto sa mga ahensya sa gobyerno.
Gipaniguro usab sa House Speaker nga ang bersyon nga isumiter sa Kamara nahisubay sa mga prayoridad ug Agenda for Prosperity ni Presidente Marcos.
Target sa Kamarabaha nga maaprubahan ang proposed budget sa dili pa mu-abot ang recess sa Oktubre.
