CAGAYAN DE ORO CITY- Nasunog ang duha ka bodega nga nagsilbing storage area sa mga produktong ligid ug mga lamas diha sa dalang Julio Pacana,Brgy Puntod sa syudad kagabii.
Gibutyag ni BFP District City Fire Marshal Supt Allan Cabut nga maoy nanag-iya sa mga bodega sila si Jack Lou Sy ug Henry Yu.
Miingon si Cabut nga pabalikan niya sa iyang mga mga imbestigador ang maong lugar aron sutaon pa ang hinungdan sa sunog.
Apan miingon si Cabut nga pagbalik sa kuryente human ang brownout sa syduad kagabii,kalit ang pag-ulbo sa sunog diin miabot pa sa ika upat nga alarma.
Hinoon,walay tawo nga samaron sa maong sunog diin mitala’g 3.6 milyones pesos ang structural damage niini kagabii.
Samtang sa pikas bahin,gikonsiderar sa Bureau of Fire Protection nga ang nag-overheat nga appliances hinungdan sa dakong sunog nga nahitabo diha sa Zone 2, Vamenta Boulevard, Brgy Carmen ning syudad.
Sumala ni BFP-Carmen Sub Station commander SF03 Samson Velarde nga nagsumikad ang kalayo sa ikaduha nga andana sa residential house nga gihimo nga boarding house sa 29 ka tinun-an.
Nadamay usab ang usa ka balay-patigayon nga gipanag-iyahan sa usa ka Eduardo Yee.
Mismo usab si Velarde ang naangol human makuryente samtang nangulo pagpalong sa kalayo.
Mitala usab sa 2.5 milyon pesos ang structural damage sa maong sunog.
