CAGAYAN DE ORO CITY – Gituki pinaagi sa special report ang kahimtang sa balor 60 milyones pesos nga 42-classroom sa Cugman National High School nga nahimo nang ‘drug den’ sa pipila ka adis-adis ug tagbu-anan sa mga manag-uyab sa Zone 9,Brgy Cugman ning syudad.
Kini human mas migrabe pa ang pag-init sa isyu dihang unang gituki sa Bombo Radyo sa pinaagi sa programang Zonalibre sa miaging mga semana.
Mismo si Konsehala Imee Moreno maoy mitawag sa atensyon sa iyang mga kauban aron mahatag’ag aksyon ang nasayang nga tunghaan alang sa kabataan sa maong lugar.
Wala diretso magamit ang maong tunghaan kay kulang sa koneksyon sa tubig ingon man koryente apan dili matrabaho sa administrasyon ni City Mayor Rolando ‘Klarex’ Uy kay daghan ang nangawala nga kabahin sa pasilidad niini.
Sa pikas bahin,gilayong magsilbing sentro sa panagtagbo sa Local School Board ang isyu.
Kini ang tubag ni education committee chairman Kag. Suzette Magtajas-Daba kabahin sa unot sa special report ni Moreno.
Namahayag si Daba nga dugay ra nga nagahinan sa pondo ang kakulangon sa maong tunghaan apan dili masugdan kay gipangkawat na ang mga linya sa koryente.
Kini ang rason nga gihataga’g prioridad sa city govt ang pagsulbad sa maong isyu dihang natuki na kini sa kahanginan.
Dugtong usab niini,nakaandam sa kanunay ang buhatan ni acting City Engr Joel Momongan nga paghatag sulbad sa kahimtang sa maong tunghaan nga dugay nang natugyan sa kontraktor ngadto sa DepEd ug mismo sa city govt.
Kini human tahasi sila ni Uy nga makig-koordinar sa mga haom nga ahensiya aron mahatagan sa kahupayan ang nasayang nga proyektong imprastraktura sa dakbayan.
Namahayag si Momongan nga posibleng dunay miscommunication hinungdan nga igo na lang nakurat ang kadaghanan kabahin sa kahimtang sa maong tunghaan.
