Mag-petisyon ang Cagayan de Oro First Taxi Drivers Alliance/CAFITADA nga ipasaka sa P65 ang flag-down rate sa mga taxi sa Cagayan de Oro tungod sa krisis nga giatubang sa mga drayber ilabina sa pagsaka sa presyo sa lana.
Sa interbyu sa Bombo Radyo, giingon ni CAFITADA President Bernie Jamaca nga karon P40 pa gihapon ang flag-down rate sa syudad bisan nagtaas na ang gasto sa operasyon sa taxi drivers.
Gipasabot niya nga sa ubang dagkong siyudad sama sa Metro Manila ug Cebu City mas taas na ang flag-down rate ug ang per-kilometer charge kumpara sa kasamtangang pamasahe sa Cagayan de Oro.
Matud pa ni Jamaca nga ang ilang panukala naglakip sa P65 nga flag-down rate, P15 nga bayad kada kilometro, ug P3 nga waiting time kada minuto aron matabangan ang mga drayber nga makasabay sa nagkataas nga gasto sa fuel ug maintenance.
Giingon usab niya nga bisan nagpetisyon sila og P65, posibleng P55 ang maaprubahan nga flag-down rate depende sa desisyon sa mga awtoridad.Naglaum ang grupo nga pinaagi sa maong petisyon, masustinar sa mga taxi drivers ang ilang panginabuhian ug makasabay sa kasamtangang kahimtang sa transportasyon ug ekonomiya sa syudad. (by James Oliver)
