CAGAYAN DE ORO CITY – Ablihan na ni Pres. Bongbong Marcos ang Panguil Bay Bridge nga nag-konektar sa syudad sa Tangub,Misamis Occidental ug lungsod sa Tubod,Lanao del Norte karong adlawa.
Nasugdan ang katukuran sa labing taas nga tulay sa Mindanao sa panahon ni kanhi Pres Rodrigo Duterte sa tuig 2016 sa maong lugar.
Ang 3. 169 kilometros nga gintas-on sa tulay ang napondohan sa sobra P7 bilyones pesos aron mahatagan sa katumanan ang dugay nang gidamgo sa katawhan sa Northern Mindanao region.
Kini nga pagbukas sa tulay ang daan nang gisulti ni Marcos sa iyang State of the Nation Address o SONA nga ablihan alang sa publiko ning tuiga.
Mihaom usab kini nga proyekto sa Marcos administration sa iyang inter-island linkage bridge program.
Dugtong niini, mamub-an na ang kataas sa oras nga pagbiyahe sa mga biyahedor kay molungtad na lang kini sa 7 minutos gikan sa usa hangtod duha ka oras nga pagbiyahe pinaagi sa ‘roll on,roll off’ kon RoRo.
Hisayrang ang maong proyekto ang ubos sa loan agreements tali sa mga gobierno sa Pilipinas ug South Korea.
