CAGAYAN DE ORO CITY – Tingkagol sa prisohan ang duha ka dinakpan nga nabawian sa mga operatiba sa Regional Special Operations Unit 10 sa sobar 7 milyones pesos nga inismagol nga sigarilyo sa Purok 12,Brgy Población,Laguindingan,Misamis Oriental.
Kini human ilusad sa RSOU 10 kuyog ang mga operatiba sa Laguindingan Municipal Police Station ang hiniusang operasyon rason nasignit sila alyas Aboy,25 anyos,helper ug alyas Tata,40 anyos nga driver sa sakyanan nga gikargahan sa klase-klaseng mga sigarilyo.
Matud ni Police Regional Office 10 spokesperson Major Joann Navarro nga subay sa gitaho sa operating units nga gikan pa sa probinsya sa Zamboanga del Sur ang kontrabando nga gisakay sa wing van aron itago unta sa bodega nga nakabase sa Laguindingan.
Apan naharang ang mga suspek rason nga dili makaabot sa giingong buyer sa kontrabando nga nagpaabot sa Bukidnon.
Gitugyan na sa kapolisan sa Bureau of Customs ang mga kontrabando samtang ang mga dinakpan hayan kasuhan sa pagsupak sa Graphic Health Warnings Law sa piskalya sa probinsya.
