CAGAYAN DE ORO CITY – Gipangayuan sa grupong ALU-TUCP ang gobierno pinaagi sa RTWPB 10 sa usbaw nga 413 pesos kada-adlaw nga suhulan alang sa mga mamumu-o dinhi sa rehiyon.
Kini human iduso ni ALU-TUCP Pres Raymond Mendoza ang petition sa wage increase sa maong buhatan kagahapong adlawa.
Gibutyag ni ALU-TUCP Northern Mindanao Regional Operations Director Nicanor Borja nga gilayon kini nga lingkuran sa ilang grupo kuyog ang grupo sa employers aron makakab-ot sa win-win solution alang sa mga trabahante.
Kon ma-aprobahan ang maong usbaw,mobalor na sa 778 pesos ang inadlawan sa mga mamumu-o nga dako’g tabang batok sa krisis dala sa pagsaka sa presyo sa produktong petrolyo ug pandemya.
Samtang nagkatawa na lamang ang pipila ka lider sa business sector sa petisyon sa ALU-TUCP nga dugang 413 pesos alang sa suhulan sa mga empleyado dinhi sa rehiyon.
Gibutyag ni Antonio Uy, presidente sa Misamis Oriental Filipino-Chinese Chamber of Commerce and Industry Inc. nga labihan ra kaayo kadako ang maong increase.
Matud ni Uy nga dili man sila supak nga patas-an ang suhulan apan kana lamang untang haum.Dugtong niini,miingon si Uy nga dili layo ang posibilidad nga daghang mga negosyo ang manirado kung ipugos ang minimug wage increase nga P413 sa rehiyon.
Matud ni Uy nga naglaum sila nga ang tinuod nga data maoy lantawon ug himoong sumbanan sa pagpasaka sa suhulan.
Dugtong niini,dili motoo ang ALU-TUCP nga moresulta sa pagka-alkansi sa mga negosyante ang ilang gipangayong P413 nga umento sa suhulan pabor sa mga mamumuo.
Gibutyag ni ALU-TUCP spokesperson Alan Tanjusay nga paghinadlok ra usab ang pagpangtangtang sa empleyado kon ipugos ang maong umento.
Matud ni Tanjusay nga dili hinoon sigurado nga maaprobahan ang ilang gipangayo ilabina nga sa naglabay’ng mga tuig nga petisyon kanunay’ng kulang ang matugtan itandi sa ilang hangyo.
Sa miaging tulo ka tuig,dunay umento nga 27 pesos lamang ang nahatag as gobierno alang sa mga empleyado dinhi sa rehiyon.
