CAGAYAN DE ORO CITY- Naglaum ang Associated Labor Unions-Trade Union Congress of the Philippines o ALU-TUCP nga positibo ang tubag sa Regional Tripartite Wages and Productivity Board -10 sa ilang petisyon nga P782.00 nga minimum wage sa mga mamumuo sa rehiyon.
Gibutyag ni Nick Borja, kinsa regional vice president sa ALU-TUCP nga mihatag na’g ”go signal” ang board aron ihikyad ang mga rason kon nganong tas-an ang minimum wage sa mga empleyado.
Si Borja miingon nga gikinahanglan na ang taas nga suhulan ilabina nga mimahal na ang mga presyo sa mga palaliton tungod sa padayon nga pagsaka sa inflation.
Una nang gibutyag ni Borja nga dili igo ang kapi’g P300 nga suhulan nga dawaton sa mga mamumuo alang sa pagpamalit sa batakang panginahanglan sa panimalay kada-adlaw.
