CAGAYAN DE ORO CITY – Nakompiskar sa hiniusang operasyon sa 1005th Maneuver Company, Regional Mobile Force Battalion 10 ug Pantar Municipal Police Station ang sobra 800-mil pesos nga gitoohang inismagol nga sigarilyo sa Brgy Campong,Pantar,Lanao del Norte.
Gibutyag ni Police Regional Office 10 Director Brig Gen Jaysen De Guzman nga nadakpan ang usa ka sakyanan nga kargado sa mga sigarilyo nga gitoohang inismagol rason nga giharang sa checkpoint.
Siya miingon nga napakyas ang mga sakay sa sakyanan sa pag-presentar sa mga dokumento sa kargamento rason nga gipangsikop ang tulo ka personalidad.
Unang gipang-ila ang mga dinakpan nga sila alyas Enting, 42 anyos; Sanny,32 anyos ug Norman,45 anyos nga pulos taga-Lanao del Norte.
Gitakdang kasuhan sa kasong kriminal ang mga dinakpan samtang gitugyan ang mga kontrabando sa Bureau of Customs.
Wala malatid sa impormasyon kon diin gikan ang mga kontrabando nga gipalusot sa mga suspek pasulod sa maong probinsya.
