CAGAYAN DE ORO CITY – Nakompiskar sa laing hugna sa magkalahing operasyon sa kapolisan ang smuggled cigarettes nga gipalusot sa mga sindikato ngadto sa pipila ka gagmay’ng tindahan sa Barangay 33 diin nakabase ang merkado ug Cogon ning syudad.
Kini resulta sa kamanduan ni PNP chief Gen Rommel Marbil nga tabangan ang Bureau of Customs pagsanta sa grabeng pagkayunap sa ismagol nga mga sigarilyo palibot sa nasud.
Miingon si Police Regional Office 10 spokesperson Major Joann Navarro nga tropa sa intelligenc unit sa Cagayan de Oro City Police Office kuyog ang mga personahe sa Cogon Police Station ug City Mobile Force Company ang mihimo sa operasyon diin nabawi nila gikan sa mga sari-sari store ang 653 ka reams.
Siya miingon nga ang maong inismgaol nga mga sigarilyo ang dunay bana-banang kantidad 229-mil 600 pesos.
Sa pikas bahin, gibutyag ni Navarro nakompiskar usab sa 2nd provincial mobile force company sa Lanao del Norte Police Provincial Office kuyog ang ubang police units ang 39 packs sa sigarilyong canon nga adunay estimated market value nga 580-mil pesos.
Saysay sa opisyal nga naglusad sa mobile patrolling ang mga pulis sa Sultan Naga Dimaporo dihang dunay nadiskobre nila nga biniyaang mga kahon sa sigarilyo sa baybayon nga bahin.
Kini ang rason nga gilayon nila gi-dokumento ug gidala sa opisina samtang gitakdang itugyan sa BoC aron magamit nga mga ebedensiya batok sa mga utok sa nagpalusot niini.
