CAGAYAN DE ORO CITY-Gikompirmar sa National Bureau of Investigation o NBI-10 nga ubay-ubay nang investors sa Freeman Traders Club o FTC ang nangayo’g tabang mabalik ang investment capital ngadto kanila.
Kini sukad nga nabutang sa kuwestiyon ang transaction nga gisudlan sa negosyo ni Mark Freeman tungod kay walay pagtugot sa balaod.
Gibutyag ni Atty Che Nacua,imbestigador sa NBI-10 nga pipila sa mga negosyante ang nakabubo sa dul-ag 10 milyon pesos gamit ang Plutous coins ni Freeman.
Gihulat usab sa NBI-10 nga dunay intresadong investors nga mosaka’g kaso batok sa maong grupo.
Samtang gipugngan sa higalang abogado sa negosyanteng si Freeman nga mapadayon ang committee hearing sa trade and commerce sa konseho sa syudad.
Kini human mitambong ang duha sa mga investor ni Freeman aron ibulgar kon giunsa sila pagdani makasulod sa maong klase sa negosyo.
Gibutyag ni Atty Ramil Acol kinsa nag-representar kang Freeman sa hearing,dili makiangayon nga ituki ang maong isyu nga wala mismo ang tawo nga giakusahan.
Kini ang hinungdan nga gihataga’g katapusang higayon ni Kag George Goking nga motunga si Freeman gikan sa South Korea aron ipasabot ang Plutuos coins investment niini sa syudad.
