CAGAYAN DE ORO CITY – Gihimuan na’g lawom nga pakisusi sa tropa ni Cogon Police Station commander Police Maj. Julius Saluta ang pagpanulis sa unom ka armadong suspek sa GoldMega Jewelry Pawnshop sa J.R. Borja Street,Brgy 29 ning syudad kaganihang buntag.
Miingon si Cogon Police Station chief investigator Senior Master Sgt Neil Apollo de las Alas nga anaa sa otso hangtod 9 milyones pesos nga balor sa mga alahas ang nadala sa mga misibat nga mga tulisan.
Siya miingon nga nakig-koodinar na usab sila sa ubang intelligence operatives aron masubay ang posibleng lokasyon sa mga tulisan.
Nasuta nga armado sa mga mugbo ug tag-as sa mga suspek ug lisod nga ilhon kay dunay mga sampong sa mga dagway atol sa maong pagpanulis.
Dumduman nga napadali ang pagpanulis sa mga suspek kay walay sekyu nga nagbantay sa pawnshop.
Hisayrang gipangtiunan pa’g mga armas ang pipila ka tawo nga nasugatan sa mga suspek samtang pasibat kini sakay sa motorsiklo.
