CAGAYAN DE ORO CITY – Kinaiya sa kakugi,paningkamot ug disiplina ang angayang huptan sa mga aktibong boksingero ubos sa Cagayan de Oro Amateur Boxing Team.
Kini ang hagit ni Olympic silver medalist Carlo Paalam sa mga kaubang boksidor nunot sa iyang pagbisita sa training center diha sa Aluba,Brgy Macasandig ning syudad.
Miingon si Carlo nga kon gusto usab sa mga batan-ong boksingero nga maabtan ang sunod nga Olympics angayang dili sila mosibog sa mga pagsulay aron maka-abot ang ilang mga pangandoy.
Nahukman ni Paalam kuyog si Olympian coach Elmer Pamisa ug City Sports Devt Program officials ang pagduaw sa iyang kaubang mga boksidor aron ipaabot usab ang gamay’ng panalangin nga bunga sa sakripisyo niini sa pamoksing.
Unang gibalik-lantaw ni Carlo kinsa bag-uhay lang nakauli sa dakbayan ang dakong natabang ni City Mayor Oscar Moreno sa iyang boxing career sukad edad 9 anyos hangtod nakaabot kini sa Tokyo Olympics sa Japan diin nasakmit ang silver medal.
