CAGAYAN DE ORO CITY-Gidawat na ni kanhi City Mayor Vicente ‘Dongkoy’ Emano ang tanyag ni Gob Bambi Emano nga panguluhan ang local peacetalks ngadto sa CPP-NPA-NDF sa Misamis Oriental.
Kini human nagpalugwa’g memorandum si Gob Emano ngadto sa iyang amahan aron mangulo sa gimando ni Pres Rodrigo Duterte nga localize peacetalks ngadto sa pikas grupo.
Apan giklaro sa kanhi mayor nga dili kini magpataka’g dawat sa tahas nga wala usab mauyuni sa komunistang grupo aron kalikayan nga mausik ang kahigayonan.
Samtang mas gusto ni City Mayor Oscar Moreno nga direktang matunulan sa batakang serbisyo ang katawhan nga layo sa kalambuan diha sa kabukiran.
Kini ang tubag ni Moreno kinsa chairman sa Regional Peace and Order Council o RPOC-10 sa mando ni Duterte nga mag-localize peacetalks ang mga gobernador ug mayores ngadto sa komunistang grupo.
Miingon si Moreno nga mas magustuhan sa katawhan ang paghatag sa serbisyo itandi sa moagi pa sa taas nga proseso ang pagkab-ot sa hisgutanang kalinaw.
