CAGAYAN DE ORO CITY-Gikasubo apan dili duphan sa liderato sa Philippine Air Force ang tinunto sa pipila sa ilang mga miembro nga nakabase sa Tactical Operations Group-10 diha sa kanhi airport sa Brgy Lumbia sa syudad.
Kini human mihimo sa pag-inom sila si Staff Sargeant Renante Blanco ug Airman 2nd Class Reymart Noquera nga nag-resulta sa pagpamusil gamit ang M-16 rifle sa miaging semana.
Miingon si PAF regional spokesperson Lt Col Ferdinand Encomienda nga tulo usab ka imbestigasyon ang gihimo sa ilang unit aron masuta ang rason ni Noquera pagpusil-patay kang Blanco.
Sila Blanco ug Noquera ang pulos special action force members sa PAF nga nakabase gikan sa Tarlac nga gipadala aron tabangan pagpulbos ang grupong Maute-ISIS sa Marawi City.
Samtang nakasuhan na sa murder si Noquera sa piskalya ning syudad kagahapon sa hapon.
Kini human pormal nga miduso sa reklamong pagpatay ang kapikas sa biktima nga si Blanco nga si Irene Acosta batok kang Noquera.
Gibutyag sa imbestigador nga si SPO2 Elmar Patindol sa Lumbia Police Station nga hulaton nila ang pag-resolbar sa piskalya sa maong kaso batok sa suspek.
Una niini,namugos ang suspek nga napusilan niya ang biktima dihang giingong gito-ok kini ug gibaharan nga patyon.
