CAGAYAN DE ORO CITY – Ensakto sa pag-atiman ug naghupot sa modernong himan ang FA-50 fighter jet rason nga dili basta-basta nga mahagsa man lang kay walay igo nga hinungdan.
Kini ang pagpasabot ni Philippine Air Force Tactical Operations Wing Eastern Mindanao Acting Commander Colonel Ryan Reynie Sonza sa nahagsa nila nga FA-50 jet diin gikamatay sa mga piloto nga sila Major Jude Salang-oy ug 1Lt April John Dadulla sa bukid sa Kalatungan,Brgy Mirayon,Talakag,Bukidnon sa milabay’ng Marso 4 sa kadlawon.
Miingon si Sonza nga wala pa matibawas ang Air Force 5th Wing investigators sa ilang trabaho hinungdang dili usab nila matubag kon unsa ang mga posibleng basehan sa pagkahagsa sa pinaka-moderno ug hi-tech nila nga eroplano.
Gani, wala pa makanaug ang mga imbestigador sukad sa pagsugod sa ilang imbestigasyon sa crash site sa miaging semana.
Dumduman nga kasamtangang nakahaya sa main headquarters nila sa Col.Jose Villamor Airbase sa Pasay City sila Dadulla ug Salang-oy ayha ibalhin sa Basa sa Airbase sa Pampanga nga nagsilbi nila nga mother unit atol sa hitabo.
Gitakda usab nga i-uli sa tagsa-tagsa ka probinsya ang duruha diin Salang-oy sa Cordillera Administrative Region samtang si Dadulla sa Manolo Fortich, Bukidnon nga gitakdang ilubong Marso 15 ang petsa nga kaslanon na unta sila sa iyang fiance nga Air Force pilot nga taga-Pangasinan
