Subling nanawagan ang sektor sa transportasyon sa kapunongan nga amendaran na ang kontrobersyal nga Oil Deregulation Law aron mahatagan og katungod ang gobyerno sa pagkontrolar sa presyo sa petrolyo.
Kini taliwala sa nagpadayong pagsaka-naog sa presyo sa lana sa merkado diin naggawas nga kanunayng alaot ug mag-antus ang mga drayber ug konsumidor sa kawalay kasegurohan sa presyohan.
Gipadangat ni UNIDA President Joel Gabatan nga sa kasamtangang balaod, walay mahimo ang pamunoan ug ang gitawag nga Big Three o mga dako nga kompanya sa lana lamang ang nagbuot-buot sa kadako sa rollback ug price hike.
Busa gipamugos ni Gabatan nga kinahanglang mabawi sa gobyerno ang regulasyon sa petrolyo aron mapanalipdan ang publiko ug dili lang ang negosyo sa mga dako nga kompanya sa lana.-
