Mensahe sa pag-ampo, paghigugma ug paglaum ang sentro sa homiliya ni Cagayan de Oro City Archbishop Jose Cabantan, DD, sa misa sa pangilin ni Sr. San Agustin, ning dakbayan, niadtong Agosto 28.
Gipunting sa arsobispo ang importanteng tahas ni Santa Monica, aron mahimong sulundon nga pagkatawo ang iyang anak nga si Sr San Agustin.
Si Santa Monica nagpakita sa iyang grabe nga pagsalig ug paglaum nga angayan panaminan samtang nagselebrar ang tibook simbahang katolika sa Jubillee of Hope.
Gi-awhag ni Bishop Cabantan nga ang tanan inahan ug mga anak nga puy-an ang paglaum ug pag-ampo subay sa ebanghelyo sa sinulat ni San Mateo Kapitolo 24 bersikulo 42 hangtud 51.
Nagpahinumdum ang arsobispo sa katawhan nga ang Ginoo moanhi sa oras nga dili nato gilauman, busa kinahanglan nga magpuyo kita nga matinud-anon ug masaligan sa atong mga buluhaton isip mga alagad sa Diyos.
Kini nagpasabot nga kita mangandam sa iyang pag-abot.
Gidasig usab niya ang mga tumutuong mopadayon sa pagpakita sa gugma ug pag-alagad, sama sa gitudlo ni San Agustin nga ang tinuod nga kahulugan sa kinabuhi mao ang pagpangita ug pag-ila sa Diyos, kuyog ang pagpuyo sa kinabuhing pagkamapainubsanon.
