Muatras sa pag-apil sa gitinguha nga welga ang lupon sa mga drayber ug operator sa syudad karong Lunes tungod sa gipatuman nga dugang sa pletehan ug gipaabot nga pag-ubos sa presyo sa petrolyo sa mga mosunod nga adlaw.
Gipahayag ni United Drivers Association o UNIDA President Joel Gabatan nga nakadesisyon ang ilang pundok nga dili na magprotesta human giaprobahan ang piso nga dugang sa pletehan nga nahimong katorse pesos ang pinakagamay nga bayad sa biyahe.
Gipasabot usab sa maong opisyal nga aduna pa’y dugang nga beinte sentimos kada kilometro nga dako na nga tabang sa ilang panginabuhi matag adlaw.
Gumikan niini, nagkahiusa ang mga drayber sa UNIDA nga ipadayon ang ilaha nga normal nga pagbiyahe aron dili na makabalda sa mga sumasakay sa syudad.
