CAGAYAN DE ORO CITY – Gikompirmar ni CLENRO head Engr Armen Cuenca nga anaa sa sobra 300 gikan sa 455 ka patay’ng lawas nga mga pasyente sa COVID-19 sa miaging Agosto ang napaubos sa cremation sa Divine Shepherd Memorial Gardens diha sa Brgy Bulua ning syudad.
Kini bisan kon napugos pagsira ang maong crematurium kay gi-reklamo sa pipila ka residente tungod sa kaitom sa aso nga gibuga gikan sa panghaw niini.
Miingon si Cuenca nga nagpasabot nga sa maong ihap sa nangamatay,dili mominus sa 20 ka lawas sa tawo ang gisunog kada-adlaw sa miaging bulan.
Nabalaka si Cuenca nga tungdo sa temporaryo nga pagsira,mahisama ang syudad sa ubang lugar nga dili na makaatiman sa patay’ng lawas sa mga pasyente nga positibo sa bayrus.
Samtang gika-dismaya ni City Mayor Oscar Moreno nga pugsanong nagsira ang crematurium sa Divine Shephered tungod sa reklamo sa pipila ka residente sa gibuga nga itom nga aso gikan sa mga gisunog nga patay’ng lawas nga positibo sa COVID-19 ning syudad.
Kini human mohimo usab ang DENR-EMB 10 nga mohimo’g tigom tali sa tigdumala sa funeral company ug mismong mga reklamante sa maong isyu.
Miingon si Moreno nga dako na unta’g tabang ang crematurium aron mahipos pagdali ang patay’ng mga lawas sa mga pasyente sa COVID-19.
Hisayrang sa sobra 17-mil nga cumulative cases sa syudad,kapin 700 niini ang nangamatay na nga pasyente sukad sa miaging tuig.
