Maayong nailatag sa prosecution team ang ilang argumento ug mga ebidensya sa ika-napulo ka adlaw sa impeachment trial sa Senado, mao kini ang obserbasyon sa kalihim sa grupong SENTRO nga si Joshua Mata.
Sa interbyu sa Bombo Radyo, gipahayag sa opisyal nga napamatud-an sa maong proceedings ang nahitabong transaksyon bahin sa giingong pag-abuso sa PHP 612.5 milyones nga confidential funds sa Office of the Vice President (OVP) ug Department of Education.
Para kaniya, tataw nga dili ordinaryo ang gihimong pag-withdraw sa dako kaayong kantidad pinaagi sa pag-cash out imbes nga gamiton ang naandan nga pamaagi sama sa bank-to-bank o tseke.
Tungod sa talagsaon nga lakang sa OVP, gipadayag ni Mata nga angay ug kinahanglan gyud nga busision ug usisahon og maayo kon giunsa paggamit ang maong pondo sa bise presidente.
