CAGAYAN DE ORO CITY-Gitawag sa grupong “Moro Consciences” nga ‘modernong pagpangilog sa yuta’ ang himoong rehabilitasyon sa gobyerno sa Marawi City.
Kini ang hinungdan kung nganong supak ang pipila ka bakwit sa planong Marawi rehabilitation.
Matud ni Moro Consciences Group leader Drieza Lininding nga wala sila manginahanglan sa tabang sa gobyerno sa himoong rehabilitasyon sa ilang lugar tungod kay nasayod sila nga pagpangawat sa yuta ang tinood nga motibo sa pag-rehabilitar sa Marawi City.
Asoy pa niini nga mas misamot ang ilang kabalaka sa dihang ilang nahibal-an nga Chinese business firm ang mangulo sa pag-rehabilitar sa ilang lugar tungod kay segurado sila nga mapuno kini sa mga negosyo.
Gitin-aw usab ni Lininding nga walay problema sa ilaha kon dili sila tabangan sa gobyerno nga subling ipabarog ang ilang mga panimalay.
Siya miingon nga maoy mahinungdanon nga dili mailog sa ilaha ang ilang mga yuta ug mga kabtangan.
Una niini, bitbit ang mga placard, miadto sa Marawi City ang mga bakwit aron supakon ang planong rehabilitasyon sa gobyerno sa ilang lugar.
Samtang gitubag ni Marawi City Mayor Majul Usman Gandamra sa pasangil sa grupong “Moro Consciences” nga ‘modernong pagpangilog sa yuta’ ang himoong rehabilitasyon sa gobyerno.
Si Gandamra miingon nga walay kamatooran ang akusasyon sa grupo tungod kay nasayod siya nga dili pagpangilog sa yuta ang himoon sa gobyerno apan tabangan ang mga residente nga subling makabarog.
Gani, nagtoo ang alkalde nga kadtong mga wala nagpuyo sa ground zero ang nagpakatag sa maong report.
Tungod niini, gi-awhag ni Gandamra ang grupo nga makig-coordinate sa Task Force Bangon Marawi aron ilang masayran ang tinood nga motibo sa Marawi rehabilitation.
