Padayon ang paggukod ug pagbantay batok sa illegal mining activity sa Misamis Oriental ubos sa kamandoan ni Governor Juliette Uy ngadto sa Task Force Kinaiyahan.
Sumala ni Celso Abucejo, Special Assistant to the Governor, adunay na usab pipila ka mga grupo nga nagpadayon sa ilegal nga pagmina sa pipila ka mga lungsod sa probinsya.
Matod niya, may nadawat silang mga report sa ginahimong illegal mining sa mga lugar sama sa Initao, Manticao, Opol ug uban pang kasikbit nga mga munisipyo.
Gawas niini, gikalipay usab sa gobernadora ang pagkadakop sa pipila ka mga foreign nationals ilabi na ang mga Chinese nationals nga nasikop sa operasyon sa Task Force Kinaiyahan kauban ang Philippine National Police.
Nagpasalig ang kapitolyo nga magpadayon ang hugot nga operasyon aron mapahunong ang illegal mining activity ug maprotektahan ang kinaiyahan sa Misamis Oriental. (James Oliver)
