Gipanghimakak ni PCol. Allen Rae Co, hepe sa Public Information Office sa Philippine National Police (PNP), ang mga balita nga nakalikay o naka-ikyas na si kanhi Bureau of Corrections (BuCor) chief Gerald Bantag gikan sa operasyon sa kapulisan human kini giingong namat-an sa usa ka poultry farm sa Ifugao.
Matud ni Co, nakadawat lamang ang lokal nga kapulisan og impormasyon nga si Bantag kanunay umanong makita o moadto sa maong lugar, maong gilunsad ang operasyon aron susihon ang report. Gipasabot niini nga dili kini mapakyas nga operasyon o usa ka escape scenario tungod kay wala man gayud didto si Bantag sa panahon sa pag-abot sa mga operatiba.
Miingon ang opisyal nga ang maong aksyon nagpakita sa determinasyon sa PNP sa pagpatuman ug pagserbisyo sa mga warrant of arrest batok sa tanang gipangita sa balaod.
Giingon usab sa opisyal nga apil sa ilang operational planning ang pagtan-aw sa tanang posibleng sitwasyon ug impormasyon nga ilang madawat.
Bisan wala makita si Bantag sa maong lugar atol sa operasyon, padayon gihapon ang imbestigasyon ug pagmonitor sa mga impormasyon nga mahimong makatabang sa iyang pagdakop.
