CAGAYAN DE ORO CITY – Makigtagbo ang Comelec 10 ngadto sa kapolisan ug militar nunot sa pagkapusili sa kandidato pagka-mayor nga si George Matunog sa lungsod sa Calamba,Misamis Occidental.
Kini human inisyal nga gikonsiderar ni Comelec 10 Director Francisco Pobe nga election related violence ang hitabo tungod sa pagsilbing kandidato ni Matunog sa 2022 elections.
Apan gibutyag sa opisyal nga hulaton nila ang resulta sa imbestigasyon sa PNP ayha sila molugwa sa ilang pinal nga hukom sa hitabo.
Hinoon,luwas na ang biktima human makaangkon sa igo sa dagway gikan sa wala matino nga kalibre sa armas.
Samtang dili ma-konektar sa PNP nga may kalabutan sa sniper attack sa kampo ni Deputy Speaker Henry Oaminal ang pagpusil kang Calamba mayoralty candidate Goerge Matunog sa miaging adlaw.
Kini bisan sakop sa partido ni Misamis Occidental Gov Philip Tan si Matunog nga karibal sa bando ni Oaminal.
Gibutyag ni Police Lt Charien Estenzo,tigpamaba sa Misamis Occidental PNP nga wala pa sila’y lig-ong ebedensiya nga magmatood niini.
Miingon kini nga may gitukod na usab nga task force aron mopadali sa imbestigasyon.
Dumduman,maoy namatay sa sniper attack si Lopez Jaena Mayor Michael Gutierrez nga kandidato pagka-bise gobernador ni Oaminal sa milabay’ng Disyembre 2021.
