CAGAYAN DE ORO CITY – Gisupak ni City Mayor Oscar Moreno ang hukom sa kapitolyo probinsyal nga angayang mapaubos gihapon sa RT-PCR test ang mga indibidwal nga gikan sa laing lugar nga mosulod sa Misamis Oriental.
Kini bisan kon gimando sa IATF national nga wala kinahanglana ang maong rekisitos kay nasabtan na’g maayo sa publiko ang health safey protocols aron batukan ang pagpanakod sa COVID-19.
Miingon si Moreno nga unta masusi’g maayo sa kapitolyo ang maong hukom nga walay mapihig sa pagtugod sa IATF nga pangitaon gihapon ang negatibong RT-PCR ayha makalahos ang mga biyahidor ilabina kon dili essential ang pagsulod sa lalawigan.
Apan giklaro sa mayor nga may probisyon usab sa IATF nga anaa pa gihapon sa LGU ang katapusang hukom kabahin sa ilang paghatag proteksyon sa katawhan batok bayrus.
