CAGAYAN DE ORO CITY – Miani sa nagkadaiyang reaksyon ang pagbiya na ni Vice Pres Sara Duterte sa liderato ni Pres Bongbong Marcos.Kini human personal nakigkita si VP Sara kang Marcos sa Malakanyang aron personal iduso ang iyang resignation communication isip kalihim sa DepEd.
Namahayag si Atty. Ed Cuaresma,kanhi presidente sa kahugpungan sa mga abogado sa syudad ug lalawigan nga wala kini makurat sa hukom ni Sara kay imposible magkauyon ang palisya ni Marcos ug mga Duterte ilabina sa West Philippine Sea issue.
Samtang pagkaipit sa politikanhong-interes sa mga tawong nagpalibot kang Marcos nag-unang rason kon nganong napugos paghawa si VP Sara.
Kini ang nakita ni Atty. Antonio Soriano,convenor sa Citizens Watch for Good Goverance Region 10 sa pagbiya ni Inday Sara sa gabinete ni Marcos.
Namahayag si Soriano nga usa ka maayong hukom ang pag-resign ni Sara kay sa hulaton pa niini nga sipaon mismo ni Marcos sa katungdanan.
Alang kang Soriano ang naghinobrang ambisyon sa politika sa mga sakop ni Marcos ang nag-unang tuyo kon nganong giipit nila ang bise-presidente.
