CAGAYAN DE ORO CITY – Nasayangan si kanhi City Mayor Oscar Moreno nga mi-retiro’g sayo pagka-empleyado si COWD General Manager Engr Antonio Young.
Kini human unang gihimong bug-at nga basehan ni Young nga tungod sa hangyo sa iyang pamilya ug sa kasamtangan usab nga kahimtang sa panglawas niini.
Namahayag si Moreno nga dili unta kini angay buhaton sa maong opisyal kay matarong kini sa iyang trabaho sa dugay nga panahon.
Apan nasabtan usab sa kanhi mayor nga naglikay na lang si Young sa bangi sa COWD ug LWUA nga gisakyan sa grabeng politika sa city hall.
Hisayang nagsugod ang pagka-diskobre sa suliran sa COWD kay nagdumili ang kasamtangang board of directors nga pabayran ang contracted financial obligations nga gisingil sa MetroPac Water kay gikuwestiyon ang pipila ka probisyon sa kontrata.
