CAGAYAN DE ORO CITY – Nasang-at na kapolisan ang kasong multiple murder batok sa lima ka sakop sa local drug group nga responsable pagpatay sa upat ka sibilyan nga naglakip sa duha ka menor de edad sa Brgy Imelda,Villanueva,Misamis Oriental.
Gibutyag ni Misamis Oriental PNP Director Col Raniel Valones nga droga ang rason kon nganong gipang-patay ang mga biktima nga tulo taga- Iligan City ug laing usa nga taga-Misamis Oriental.
Miingon si Valones nga maoy target sa mga sindikato ang usa ka ginang apan nahinaykan ang duha niini ka anak hinungdan sa ilang kamatayon.
Gipugngan una ang pagpagawas sa pangalan sa mga suspek samtang gihulat ang paglugwa sa warrant of arrest gikan sa korte ning lalawigan.
Samtang gi-depensa ni Valones ang pakyas pagpakgang sa linu-og nga salvaging sa upat ka sibilyan sa lungsod sa Villanueva ning lalawigan.
Kini human gikuwestiyon kon unsay gihimo sa tulo ka checkpoints sa PNP nga giagian sa mga suspek gikan sa El Salvador City ingon man sa Opol ug lahos sa dakbayan ayha nakasulod sa Villanueva sa miaging adlaw’ng Domingo sa kadlawon.
Gibutyag ni Valones nga ang wala gilayong pagsulti sa mga saksi sa hitabo ang kabahin sa langan nga pag-responde sa mga otoridad.
Una niini,nasaksihan sa mga testigo ang pagdagit sa mga suspek nga nagpatoong pulis sa mga biktima sakay sa gisunog usab nga taxi.
