CAGAYAN DE ORO CITY – Naglugwa na sa ilang legal opinion ang Office of the Government and Corporate Counsel (OGCC) kabahin sa gipangayo nga baruganan sa regular officials sa Cagayan de Oro Water District (COWD) kon ensakto ba o dili ang internal control nga gihimo sa Local Water Utilities Administration (LWUA) sugod Mayo 30 ning tuiga.
Kini human gisulti ni OGCC Government Corporate Counsel Solomon Hermosura nga legal ang gihimong pagtake-over ng LWUA sa COWD kay gitahasan ni Pres Bongbong Marcos nga sulbaron ang gisagubang nga mga suliran nga naglakip sa isyu sa bayrunong minilyon ngadto sa Cagayan de Oro Bulk Water Incorporated (COBI).
Nagsumikad ang OGCC legal opinion sa gihangyo ni COWD’s in-house legal counsel Atty. Angel Avenido ug regular COWD General Manager Engr. Antonio Young kay gi-kuwestiyon nila ang pagpanginlabot sa LWUA sa ilang internal affairs niini kay gisandigan nila ang unod sa Presidential Decree 198.
Una nang namahayag ang regular COWD officials nga dili nila ilhon,tahuron ug sundon ang LWUA takeover kay alang kanila dili sila angay sudlan sa laing mga personalidad kay dakong kasupakan sa mga probisyon sa PD 198.
Gani,midangop pa sila sa korte kay gikuwestiyon ang LWUA intervention apan gibasura hinungdang naghulat sa hukom nga ilugwa sa OGCC.
Dumduman nga namahayag usab si Young nga kon unsa man ang ruling sa OGCC, andam niya kining sundon.
Sa miaging mga semana,naglugwa sa legal opinion ang Department of Justice apan gigamit nga reperensiya ang PD 198 ug dili ilang kaugalingong mga punto-legal kabahin sa isyu.
Tungod sa OGCC legal opinion, gihulatan sa publiko kon sundon sa regular board of directors ug management sa COWD ang ilang unang nabutyag sa publiko nga andam mo-respeto sa resulta sa gipangayo nila nga katin-awan sa maong isyu.
Hisayrang nasagulan sa politika sa mga aktibo ug pipila ka kanhi elected officials ang isyu sa panubig sa dakbayan rason nga dunay inadlaw nga prayer rally ang COWD union workers aron mabalik na sila sa normal nga sitwasyon.
