Dili angayan nga ipaubos pa ang edad sa criminal liability sa mga bata luyo sa mga panawagan human sa trahedya sa Tacloban City.
Sumala ni Stella Setier-Ferrarez, usa ka Registered Psychometrician, ang pag-usab niini ngadto sa napulo ka tuig ang panuigon makapakyas sa katuyoan sa Republic Act 9344 nga nanalipod sa interes sa mga bata.
Gipahinumdoman ni Ferrarez nga base sa kasinatian sa wala pa ang maong balaod, ang pagpasulod sa mga bata sa prisuhan wala nakatabang sa ilang pagbag-o ug hinuon nakapasamot pa kini sa ilang batasan.
Busa, gihatagan og gibug-aton sa eksperto nga angayan hinuon nga tabangan ug i-rehabilitate ang mga batan-on aron sila makabaton og kahigayonan nga magbag-o.
