Gikahadlokan sa Solutions Architect ug CEO nga si Joever Monceda ang sobrang pagdepende sa artificial intelligence o AI sa mga kabatan-onan karong panahona.
Subay niini, gipasabut sa maong eksperto nga ang labing dako nga peligro sa maong teknolohiya mao ang pag-ubos sa critical thinking skills sa usa ka bata sanglit tanang problema ug pangutana sa tulunghaan kay ipaagi na man lang sa cellphone.
Hinungdan nga gitandi sa maong opisyal ang AI sa usa ka kutsilyo nga pwedeng magamit sa pagluto o sa dili maayong katuyoan depende sa ka-responsable sa tawo nga nagkupot niini.
Hinuon sa laing bahin, gidugang usab niini nga aduna gihapon kini maayong epekto tungod kay makahimo man kini og bag-ong mga trabaho ug oportunidad sa katilingban kung magamit ug ma-manage sa hustong paagi.
