“Irrelevant” mao kini ang komento ni Atty. Teodoro A. Pastrana, Dean sa San Sebastian College-Recoletos College of Law, sa padayong pag-ungkat sa college credentials ug performance ni Vice President Sara Duterte bisan wala kini klarong kalabutan sa impeachment complaint batok kaniya.
Matod pa ni Pastrana, walay basihan ang maong mga alegasyon ug wala siyay nakita nga legal o opisyal nga rason aron hisgutan pa ang akademikong rekord sa bise presidente sulod sa maong proseso.
Dugang pa niya, makapaguol nga naapil ug naladlad ang ilang College of Law sa kontrobersiya, bisan usa kini ka pribado ug Katolikong institusyon nga dugay nang nailhan sa maayong kalidad sa legal nga edukasyon.
Gipasabot usab sa dekano nga daghan nang alumni sa San Sebastian ang nahimong takos ug iladong lider sa gobyerno, lakip na niini si Vice President Sara Duterte, si Senador Francis Tolentino ug si Congressman Joel Chua.Tungod niini, giingon ni Pastrana nga mas angay tutokan ang mga tinuod nga isyu sa impeachment ug dili ang mga butang nga wala diretsong kalabutan sa kaso.
