Giklaro Catholic Faith Defenders Cagayan de Oro nga walay kalainan ang pagbadlis sa agtang nga buhaton sa usa ka pari ug sa usa ka lay minister, busa angay kining dawaton sa mga Katoliko nga magtutuo.
Sumala ni Wenie Mingo sa Catholic Faith Defenders, pareho ra ang espiritwal nga bili sa pagbadlis sa abo bisan kinsa pa ang magbuhat niini, tungod kay ang kahulugan niini naggikan sa pagtuo ug dili sa persona nga nagpatuman sa ritwal.
Nagpahimangno usab ang CFD sa pagsugod sa Kwaresma nga dili lang kutob sa Ash Wednesday hangtod sa Adlaw sa Pagkabanhaw ang pagpakabinuutan.
Matod ni Mingo, angay nga ikinabuhi sa matag magtutuo ang pagkamaayo, pagpaubos, ug pagsunod sa mando sa Ginoo, dili lamang sulod sa usa ka panahon kondili sa tibuok kinabuhi.
Samtang nagpadayon ang panahon sa pagpuasa, gihangyo usab sa Simbahan ang mga Katoliko nga magpuasa dili lang sa pagkaon kondili apil na sa paggamit sa mga gadget ug social media, isip pamaagi sa paglikay sa sobra nga kalibog ug paghatag og panahon sa pag-ampo ug pamalandong.-
