Adunay kabalaka si Professor Jestoni Babia, LPT, MAEd, EdD ug presidente sa City College of Cagayan de Oro, sa planong pagbalhin sa pipila ka general education subjects gikan sa kolehiyo ngadto sa Senior High School.
Sumala sa propesor, posible kining makapaluya sa liberal education tradition sa mga kolehiyo ug unibersidad tungod kay maminusan ang exposure sa mga estudyante sa mga hisgutanan sama sa pilosopiya, etika, literatura, kasaysayan, komunikasyon ug mga sosyal nga isyu.
Dugang pa niya, daghang magtutudlo ug edukador ang nabalaka kay sobra ang pagpunting sa bag-ong kurikulum sa employability ug panginahanglan sa industriya samtang mahimong mapasagdan ang nationhood, citizenship ug human formation.
Giingon usab ni Babia nga dili patas nga gi-assume sa sektor sa edukasyon nga namaster na sa tanang Senior High School students ang mga competencies nga kasagarang gitudlo sa general education subjects, ilabina nga dili parehas ang kalidad sa implementasyon sa edukasyon sa nagkalainlaing bahin sa nasod.
