CAGAYAN DE ORO CITY – Gihimakak sa Philippine Army pinaagi sa 4ID nga nabaligya na ang kayutaan nga sakop sa gitindugan sa Kampo Evangelista hinungdang puwersado ang pag-demolish sa mga kabalayan sa lot numbers 4354 ug 4357.
Kini human unang mikatag ang impormasyon nga anaa sa 50 bilyones pesos ang bayad sa pagpalit sa maong kayutaan kay tukuran sa dagkong negosyo sa umaabot katuigan.
Miingon si 4ID Demolition designate spokesperson Army Capt Abby Lorenzo nga wala sila’y nadawat ug dakong imposible ang maong impormasyon.
Namahayag si Lorenzo nga katukuran sa dugang pasilidad alang sa mga sundalo ang ipuli sa maong mga lote sukwahi sa intriga nga walay basehan.
Samtang kutob lang sa paghatag pagkaon sulod sa mga limitadong adlaw ang mahimo sa konseho alang sa gatusang mga pamilya nga apektado sa demolasyon sulod sa Kampo Evangelista,Brgy Patag ning syudad.
Kini maoy pasalig ni Puntod Brgy Kap. Eric Abaday sa iyang mga residente nga temporaryong nagpasilong sa covered court sa ilang brgy sugod kagahapong adlawa.
Namahayag si Abaday nga unta giatiman sa 4ID ang mga kanhi sundalo ug mga pamilya niini nga naigo sa demolasyon kaysa ipasa sa laing ahensiya sa gobierno.
Una nang namahayag ang 4ID nga naghangyo sila sa city govt pinaagi sa CHUDD apan lisod usab mo-qualify ang demolition victims.
