CAGAYAN DE ORO CITY – Dako’g tabang alang sa proteksyon sa mga baboy ang mando ni Gov Bambi Emano nga pag-ban sa swine products gikan sa Rizal ug Bulacan nga dili makasulod sa Misamis Oriental.
Kini human naniguro ang probinsya nga dili maapektuhan ang commercial ug backyard hog raisers tungod sa African Swine Fever o ASF nga mipatay na sa daghang baboy didto sa Luzon.
Miingon si DA-10 regulatory division chief Juliet Araos nga unta mohimo usab ang ubang probinsya sa hugot nga pagbantay batok ASF ilabina nga 65 porsiento sa mga baboy sa rehiyon ang giakn sa backyard raisers.
Samtang gipanawagan ni Mindanao Container Terminal o MCT port collector John Simon ang paghiusa sa tanan aron maseguro nga dili makasulod sa Northern Mindanao ang African Swine Fever o ASF.
Gibutyag ni Simon nga naila ang Mindanao nga daghang entry points sa mga kontrabando ug mao kini ang angayang bantayan sa Department of Agriculture o DA-10.
Siya miingon nga gikinahanglan nila ang suporta sa katawhan aron mapakigbatukan ang pagsulod sa virus nga makaapekto sa mga binuhing baboy.
Una nang gibutyag ni Simon nga bisan sila ang nagpatuman sa hugot nga seguridad aron dili makasulod ang ASF sa amihang Mindanao.
