CAGAYAN DE ORO CITY – Gidepensa ni Camiguin Governor Jesus Jurdin ‘JJ’ Romualdo ang pagkompiskar sa lima ka isdang bariles nga nakuha sa mga mangingisda nga taga-Zamboanga province nga unang midunggo sa ilang isla.
Kini human midunggo ang sakayang pandagat sa maong 22 ka mangingisda sa isla nga walay pirmiso gikan sa provincial ug municipal government sa Camiguin sa miaging semana.
Miingon si Romualdo nga bugtong makapangisda sa dagat nga sakop sa probinsya ang mismong taga-isla ug dili ang naggikan sa laing mga lugar sa nasud.
Una niini,gipapauli sa kapolisan ang maong mga mangingisda nga wala gipadala ang ilang mga kuha ug gidid-ang makabalik sa Camiguin kon walay makuha nga permiso.
Nasayran nga miani’g pagsaway ang gihimong pagkompiskar sa mga isda ug gi-kuwestiyon ang aksyon ilabina nga dili kumpirmado kon sa kadagatan sa Camiguin nakuha ang 300 kilos nga mga isdang bariles sa miaging semana.
