CAGAYAN DE ORO CITY – Tabangan sa local govt unit sa Tupi nga mapadali ang pagproseso sa mga kinahanglang papeles alang sa pagbiyahe pa-Cagayan de Oro sa lima ka patay’ng lawas sa usa ka pamilyahan gikan sa South Cotabato.
Kini kon ihinayon sa pamilyang Maglente nga dad-on ang mga patay’ng lawas sa ilang kabanay nga namatay tungod sa dugu-ong disgrasya sa L300 van sa maong lungsod sa miaging Disyembre 23 ning tuiga.
Gibutyag ni Emil Sumagaysay,hepe sa Tupi Municipal Disaster Risk Reduction Management Council nga mismo ang local govt officials nila ang nagpasalig sa pag-assister aron mapadali ang pagpahiluna sa mga biktima dinhi sa dakbayan.
Siya miingon nga nasubo sila sa gidangatan sa mga biktima kinsa igo lang midangat sa Polomolok,South Cotabato aron unta motambong sa family reunion sugod Disyembre 22.
Apan subo lang kay paghuman pagpanuroy sa mga biktima sa Land of Praise ug pabalik na sa Polomolok,nawad-an sa preno ang van hinungdang gipugos pagbangga sa punuan sa kahoy aron dili unta grabe ang epekto.
Namatay sa maong disgrasya ang magtiayong si Joel ug Annabelle Maglente ingon man ang ilang mga anak nga sila Joann,Duke ug Ike samtang nadamay usab ang duha ka pag-umangkon nga pulos menor de edad.
Hisayrang nanimuyo ang mga biktima sa Greenville Subdivision sa Brgy Bugo ning syudad.
