Dili pa matino sa pagkakaron kung asa gyud naggikan ang daghang langaw nga nagpalibot sa pipila ka kabalayan, base kini sa Exclusibong pakighinabi sa Bombo Radyo kang Kagawad Antuy Pascual. Sumala ni Pascual, gina-imbestigahan karon ang pag-ila sa mga posibleng lugar nga mahimong gigikanan niini, lakip na ang mga poultry, farm, piggery, ug uban pang lugar nga adunay daghang manure diin kasagaran mag-breed ang mga langaw.
Gibutyag usab nga adunay inspeksyon nga ipahigayon aron masuta kung asa gyud nagpadaghan ang mga langaw nga nakaapekto sa komunidad.
Bisan pa man nga daghan ang nagtuo nga ang poultry sa Baungon maoy hinungdan sa problema, giingong mga lima ka kilometro ang gilay-on niini gikan sa apektadong lugar.
Gipasabot sa mga otoridad nga kasagaran molupad lamang ang mga langaw sulod sa usa hangtod tulo ka kilometro gikan sa ilang gigikanan.
Apan posible gihapon nga makaabot sila og mas layo depende sa kusog sa hangin ug kahimtang sa palibot.- (Jane Abulag)
