CAGAYAN DE ORO CITY – Gimando ni Regional Trial Court Branch 21 Presiding Judge Gil Bollozos sa PNP ingon man sa NBI ang pagdakop kang Balingoan vice mayoralty candidate Richard Gepte, 52 anyos,minyo ug kauban Reynaldo Tortusa nga pulos taga-Brgy San Alonzo,Balingoan,Misamis Oriental.
Kini human dunay basehan ang kasong murder nga gipasaka sa pamilya pinaagi sa kapolisan batok sa duruha isip mga akusado pagpa-ambush patay kang Maria Reyna-Xavier University Hospital medical director Dr Raul Winston Andutan Jr sa Brgy Nazareth sa syudad Disyembre 2,2021.
Gibutyag ni City Police Director Col Aaron Mandia nga kamulo na tracker teams sa PNP,CIDG 10 ug NBI 10 sa pagpangita sa duruha aron ma-presentar sa korte diin nakasang-at ang kasong pagpatay kang Andutan.
Dumduman nga sa gilusad nga follow up operation sa PNP,gilayong nadakpan ang tulo ka gun for hire suspected killers nga sila si Joel Nacua kinsa maoy mipusil;Marjun Cabug ug Jomar Adlao nga nagsilbing ‘lookouts’ sa ilang pag-ambush kang Andutan nga padulong unta sa trabaho.
Si Gepte ang kanhi na nadakpan sa kasong illegal possession of firearms ug paghupot sa mga bala sa dihang gisilbi sa CIDG-MisOr ang search warrant sa Purok 2,Mantangale,Balingoan sa lalawigan sa miaging Agosto 2017.
Siya nagsilbi usab nga kanhi kapitan sa Barangay Mantangale ug konsehal sa ilang lungsod.Dugtong niini,abli ang mga mikropono sa Bombo Radyo aron makahatag tubag si Gepte sa akusasyon batok kaniya.
