Nagpamay na matud pa sa legal nga kapilian ni Senador Ronald “Bato” Dela Rosa ang pagdeny sa Korte Suprema sa petisyon nga pugngan una ang implementasyon sa posible nga arrest warrant gikan sa International Criminal Court batok kaniya.
Sumala ni Atty. Eddie Cuaresma, former IBP MisOr-CDO Chapter President, dako ang posibilidad nga maapil usab sa pagdeny ang main petition sa Senador ilabina nga wala nakita sa Supreme Court ang klaro ug dili malalis nga legal nga katungod aron mapugngan ang posible nga pag-aresto.
Dugang pa niini nga base sa kasagarang mga kaso, kon madenyohan ang temporary restraining order o TRO, kasagaran mosunod ang pagbasura sa main case, bisan posible gihapon nga mausab ang desisyon sa korte sa ulahi.
Gipasabot usab ni Cuaresma nga ang desisyon sa Korte Suprema nagpakita nga wala nakita sa korte ang igo nga urgency o legal basis aron hunongon ang posibleng aksyon batok sa senador.
Bisan pa niini, giingon sa abogado nga aduna gihapoy posibilidad nga mausab ang ruling sa Supreme Court, apan sa kasamtangang kahimtang, mas nipis ang tsansa nga mapaboran ang kampo ni Dela Rosa sa maong legal nga panaglalis.
